پھولنگر: زمین کے انتقال کے عوض کروڑوں روپے مبینہ رشوت کا معاملہ، پٹواری منشی سمیت گرفتار، نائب تحصیلدار فرار!
پھولنگر: زمین کے انتقال کے عوض کروڑوں روپے مبینہ رشوت کا معاملہ، پٹواری منشی سمیت گرفتار، نائب تحصیلدار فرار!
پھولنگر (ویب ڈیسک): باٹھ کلاں میں ایک بڑا مالیاتی اسکینڈل سامنے آیا ہے جہاں اینٹی کرپشن قصور کی ٹیم نے تھانہ سرائے مغل پولیس کے ساتھ مل کر ایک بڑی قانونی کارروائی کی ہے۔ کارروائی کے دوران مبینہ طور پر کروڑوں روپے کی غیر قانونی وصولی (رشوت) کے الزام میں متعلقہ پٹواری اور اس کے منشی کو حراست میں لے لیا گیا ہے جبکہ شریک ملزم نائب تحصیلدار موقع سے فرار ہونے میں کامیاب ہو گیا۔
📌 زمین کا انتقال اور خطیر رقم کا مبینہ مطالبہ:
متاثرہ شہری محمد سلیم کی جانب سے دی گئی شکایت کے مطابق، سرکل پٹواری باٹھ کلاں نے اپنے منشی اور نائب تحصیلدار کے ساتھ مل کر زمین کا انتقال پاس کرنے کے عوض مبینہ طور پر 1 کروڑ 29 لاکھ 70 ہزار روپے کی بھاری رقم وصول کی۔ شہری کا دعویٰ ہے کہ اس رقم میں سے 38 لاکھ روپے سے زائد کی رقم نقدی اور بینک اکاؤنٹ کے ذریعے نائب تحصیلدار دیس محمد نے خود وصول کی تھی۔
اینٹی کرپشن اور پولیس کی مشترکہ چھاپہ مار کارروائی:
شہری کی درخواست پر اینٹی کرپشن قصور کی ٹیم نے قانونی ضابطے پورے کرتے ہوئے تھانہ سرائے مغل پولیس کے ہمراہ باٹھ کلاں میں کارروائی کی، جس کے نتیجے میں پٹواری پرویز شاہ اور اس کے منشی عاطف کو رنگے ہاتھوں گرفتار کر لیا گیا۔ حکام کے مطابق دونوں ملزمان کو حراست میں لے کر تفتیش شروع کر دی گئی ہے۔
نائب تحصیلدار فرار، گرفتاری کے لیے چھاپے جاری:
چھاپے کے دوران مبینہ ملزم نائب تحصیلدار دیس محمد موقع سے فرار ہونے میں کامیاب ہو گیا، جس کی گرفتاری کے لیے اینٹی کرپشن اور پولیس کی ٹیمیں متحرک ہیں اور مختلف مقامات پر چھاپے مارے جا رہے ہیں۔ محکمہ اینٹی کرپشن کے حکام کا کہنا ہے کہ قانون سے بالاتر کوئی نہیں اور میرٹ پر تفتیش مکمل کر کے تمام حقائق عدالت کے سامنے پیش کیے جائیں گے۔
Comments
Post a Comment